Haar mat maniye

Namsakar Mitron,

Aksar ham apani pareshaniyon se ladkar haar maan lete hain aur thak jaate hain, kintu ham ye nahi jante ki shayad hamari ek aur koshish hame safal bana deti. Aksar ham vahin se laut aate hain jab ham safalata ke sabse karib hote hain. Aaiye aapko batata hun ek aisi hi kahani jisse aapko dharypurvak kaam karne ki prerana milegi.

Ek aadami apne gadhe ko lekar shahar se laut raha tha. Kachche raston par chalate-2 galati se gadhe ka pair fisal gaya aur vah ek bahut gahre gadhdhe me gir gaya. Uska malik bahut pareshan ho gya aur usane us gadhe ko nikalane ki bahut koshish ki kintu vah us gadhe ko nahi nikal paya.

Prayas karke vah itna thak gya ki use lagne laga ki gadhe ko gadhdhe se bahar nikalana ab ashambhav hai, usane socha ki isko yahi chhodna padega. Yah vichar karke usne socha ki isko isi gadhdhe me dhak deta hu aur usane pas padi mitti ko uske upar fekana shuru kar diya.

Bahut der tak us gadhdhe me mitti dalne ke baad jab vah thak gya tab vah dukhi man se apne ghar ki or chal diya. Usake jaane ke baad gadhe ne khud us gadhdhe se nikalne ka prayas karna shuru kar diya. Us gadhdhe me padi mitti ab uske nikalne me sahayak ho gayi.

Vah gadha usi mitti par pair rakh kar bahar nikalne ka prayas karta raha aur kuchh der me vah us gadhdhe se bahar nikal gya aur apne malik ke ghar chala gya. Subah jab vah vykti utha aur usane us gadhe ko dekha to bahut khush hua aur aaschary se bhar gaya.

Dosto is kahani se hame yahi shiksha milati hai ki hame kabhi haar nahi manani chahiye aur baar-baar koshish karani chahiye.